اسلام آباد – 28 – فيبروري (اي پي پي) پرڏيهي معاملن واري مملڪتي وزير حنا رباني کر چيو آهي ته پاڪستان ۽ ڪويت جي وچ ۾ گڏيل مفاد تي ٻڌل گهرا دوستاڻا ۽ ڀائراڻا لاڳاپا قائم آهن، ٻنهي ملڪن جي عوام جي دل صدين کان گڏ ڌڙڪي ٿي، پاڪستان ۽ ڪويت جا لاڳاپا وقت سان گڏ وڌيڪ مستحڪم ٿي رهيا آهن. اهڙن خيالن جو اظهار هن پرڏيهي وزارت ۾ پاڪستان ۽ ڪويت جي سفارتي لاڳاپن جي 60 هين سالگرهه جي مناسبت سان منقعد تقريب کي خطاب ڪندي ڪيو. تقريب جو اهتمام پرڏيهي وزارت ۽ ڪويت جي سفارتخاني گڏيل طور تي ڪيو هو. تقريب ۾ مملڪتي وزير حنا رباني کر کانسواءِ پاڪستان ۾ ڪويت جي سفير ناصر عبدالرحمان جي المطيري، پرڏيهي سيڪريٽري ڊاڪٽر اسد مجيد خان، اسلام آباد ۾ مقرر غيرملڪي سفارتڪارن، پرڏيهي وزارت جي آڦيسرن، واپارين ۽ ميڊيا جي نمائندن ۽ ٻين اهم شخصيتن شرڪت ڪئي. مملڪتي وزير حنا رباني کر چيو ته پاڪستان ۾ گذريل سال ايندڙ تباهي آڻيندڙ ٻوڏ دوران ڪويت پاڪستان جي مدد لاءِ اهم ڪردار ادا ڪيو، پاڪستان ۽ ڪويت تاريخ، جاگرافيائي ۽ دلين سان ڳنڍيل آهن. هن چيو ته ٻنهي ملڪن جي عوام جي وچ ۾ پراڻا، دوستاڻا ۽ گهرا لاڳاپا قائم آهن. مملڪتي وزير چيو ته پاڪستان ۽ ڪويت جي 60 سالا سفارتي لاڳاپن جي تقريبن جي اڄ شروعات ٿي آهي، ٻئي ملڪ واپار ۽ اقتصادي شعبي ۾ لاڳاپن کي فروغ ڏيندا. پاڪستان ۽ ڪويت مشڪل حالتن ۾ هڪ ٻئي جو ساٿ ڏنو آهي. هن چيو ته ڪويت 2005ع جي زلزلي کانپوءِ پاڪستان ۾ امدادي ڪمن ۾ وڌي چڙهي حصو ورتو، پاڪستاني فورسز نار جنگ کانپوءِ ڪويت ۾ بارودي سرنگهن جي صفائي دوران پنهنجي جانين جا نذرانا پيش ڪيا. حنا رباني کر چيو ته ڪويت پاران ويزا ۾ سهولت سان پاڪستاني واپارين کي فائدو ملندو، اسان سمورن شعبن ۾ تعاون کي فروغ ڏيڻ جا خواهشمند آهيون. ان موقعي تي پاڪستان ۾ ڪويت جي سفير خطاب ڪندي تقريب جي شرڪت ڪندڙن جي آجيان ڪئي. هن چيو ته ٻنهي ملڪن جي وچ ۾ سفارتي لاڳاپن جا 60 سال مڪمل ٿيا آهن، ڪويت ۽ پاڪستان جي وچ ۾ پراڻا لاڳاپا قائم آهن، ڪويت پاڪستان ۾ 2005ع جي زلزلي، 2010ع جي ٻوڏ ۽ 2022ع جي تباهي آڻيندڙ ٻوڏ کانپوءِ پاڪستان جي امداد ڪئي، ڪورونا جي وبا دوران به ٻنهي ملڪن هڪ ٻئي سان تعاون ڪيو، ڪويت ۽ پاڪستان جي وچ ۾ صحت جي شعبي ۾ تعاون جاري رهندو. ڪويتي سفير چيو ته ٻنهي ملڪن ۾ گڏيل لاڳاپن کي فروغ ڏيڻ جي خواهش موجود آهي. هن چيو ته ڪويت ۽ پاڪستان جي وچ ۾ واپار ۽ ٻين شعبن ۾ تعاون جا وسيع امڪان موجود آهن جن کي وڌيڪ مستحڪم ڪيو ويندو، ٻاهرئين ملڪ رهندڙ پاڪستاني ڪويت جي ترقي ۾ اهم ڪردار ادا ڪري رهيا آهن. ان کان اڳ پاڪستان ۽ ڪويت جي وچ ۾ سفارتي لاڳاپن جا 60 سال مڪمل ٿيڻ جي موقعي تي منعقد تقريب ۾ ٻنهي ملڪن جي قومي ترانن جون ڌُنون وڄايون ويون، پاڪستان ۽ ڪويت جي وچ ۾ سفارتي لاڳاپن جي شروعات 1963ع ۾ ٿي هئي، ٻنهي ملڪن جي وچ ۾ حڪومتي ۽ سرڪاري سطح سان گڏوگڏ اداراجاتي تعاون پڻ قائم آهي. ڪويت پاڪستان ۾ 2005ع جي زلزلي ۽ 2022ع جي تباهي آڻيندڙ ٻوڏ کانپوءِ پاڪستان جي ڀرپور مدد ڪئي هئي. پاڪستان ۽ ڪويت جي سفارتي لاڳاپن جي 60 هين سالگرهه جي موقعي تي ٻنهي ڀائرن ملڪن جي لاڳاپن بابت تصويري نمائش پڻ منعقد ڪئي وئي. مملڪتي وزير ۽ ڪويت جي سفير ان موقعي تي هڪ گڏيل لوگو جي پڻ رونمائي ڪئي. ڪويت جي سفير مملڪتي وزير حنا رباني کر هڪ شيلڊ پڻ ڏني. تقريب ۾ پاڪستان ۽ ڪويت جي وچ ۾ سفارتي لاڳاپن بابت هڪ دستاويزي فلم پڻ ڏيکاري وئي.
.jpg)
