اسلام آباد – 28 آگسٽ (اي پي پي) اطلاعات ۽ نشريات واري مملڪتي وزير فرخ حبيب چيو آهي ته وفاق 3 سالن دوران سنڌ حڪومت کي 1900 ارب کان وڌيڪ ڏنا، ان جو حساب ڏنو وڃي، 650 ارب جو سنڌ ٽرانسفارميشن پلان ۽ 450 ارب سنڌ رورل ترقياتي پئڪيج پڻ وفاق سنڌ جي عوام جي لاءِ ڏنو آهي، بلاول صاحب، شايد توهان کي خبر نه آهي ته سنڌ تي گذريل 13 سالن کان پيپلزپارٽي حڪومت ڪري رهي آهي، سنڌ جي عوام کي بنيادي سهولتن جي فراهمي سنڌ حڪومت جي ذميواري آهي، سنڌ حڪومت پنهنجي ذميواري ادا ڪرڻ ۾ ناڪام رهي، سنڌ ۾ گهٽيون، ناليون، رستا پڪا ڪرڻ، پيئڻ جي پاڻي جي فراهمي، صحت جون سهولتون جيڪڏهن وفاق کي ئي ڏيڻيون آهن ته پوءِ پيپلزپارٽي وٽ سنڌ تي حڪومت جو ڪهڙو جواز بڻجي ٿو. اطلاعات ۽ نشريات واري مملڪتي وزير فرخ حبيب بلاول ڀٽو جي بيان تي ردعمل ۾ چيو ته پي ٽي آءِ حڪومت پنهنجي 3 سالا ڪارڪردگي پيش ڪري ڇڏي آهي، سنڌ جي عوام پيپلزپارٽي کان 13 سالا ڪارڪردگي جو پڇي رهي آهي. هن چيو ته زرداري ۽ پوءِ بلاول جي ڪمال مهارت سان ملڪي سطح جي پارٽي اڄ علائقائي پارٽي بڻجي چڪي آهي، پيپلزپارٽي حڪومت پنهنجي 5 سالا اقتدار جي دور ۾ ڪرپشن، مني لانڊرنگ، جعلي اڪائونٽس ۾ مصروف رهي انهي لاءِ ان وٽ عوام کي ٻڌائڻ جي لاءِ ڪجهه نه آهي. هن چيو ته وزيراعظم عمران خان انهن ٽن سالن ۾ ايندڙ نسلن جي لاءِ بي مثال ڪم ڪيو آهي، حڪومتي قدمن جي ڪري روزگار جا تمام گهڻا موقعا پيدا ٿي رهيا آهن، رڳو 10 وڏن پاڻي ذخيرن جي منصوبن ۾ 7 لک نوڪرين جا موقعا پيدا ٿيندا. هن چيو ته پاڪستان اسٽيل ملز سميت سرڪاري ادارن کي تباهه ڪرڻ جون ذميوار (ن) ليگ ۽ پيپلزپارٽي آهن. ماضي ۾ پنهنجي سياسي دڪان چمڪائڻ جي لاءِ سرڪاري زمين تي قبضا ڪرايا ويندا رهيا آهن. هن چيو ته بلاول اندرون سنڌ جي عوام کي ڪيستائين بيوقوف بڻائيندو رهندو، پيپلزپارٽي ڪيترا ڀيرا اقتدار ۾ آئي پر روٽي، ڪپڙا، مڪان نعري جي حد تائين رکيو. فرخ حبيب چيو ته پاڪستان جي تاريخ ۾ پهريون ڀيرو پي ٽي آءِ حڪومت احساس پروگرام تحت سماجي تحفظ جا 34 پروگرام پيڙهيل طبقن جي لاءِ شروع ڪيا، اڄ تائين جن کي ڇت ميسر نه هئي انهن جي لاءِ گهٽ آمدني هائوسنگ پروگرام شروع ڪيو ويو، نوجوانن کي پنهنجي پيرن تي بيهارڻ جي لاءِ ڪامياب جوان پروگرام تحت 22 ارب رپيا فراهم ڪيا ويا.
.jpg)
